Eusko Lurra fundazioa » ilegalizaizoak

Antxon Gomezen Adierazpenak EAE-ANVren ilegalizazioa dela eta Berria egunkarian

lurra — Wed, 16 Jan 2013 20:42:34 +0000

Antxon Gomez EAE-ANVren idazkari nagusia izan zen bere garaian eta egun Eusko Lurra Fundazioaren partaidea da. Giza Eskubideen Auzitegiak emandako EAE-ANV-ren ilegazlizazioaren inguruko epaia izan dela eta, Berria egunkarian elkarrizketa egin diote. Hona hemen elkarrizketa.

Antxon Gomez. EAE-ANVko idazkari nagusi ohia
«Alderdien Legeak dirauen bitartean mehatxua dago»
Oihana Elduaien

EAE-ANV legez kanpo uzten duten hirugarren aldia da. Hango idazkari nagusi ohi Antxon Gomezek argi dauka hori Euskal Herriaren historiaren isla dela.

Espero al zenuten erabaki hau?

Aspalditik balorazio bat eginda daukagu: epaitegiak bultzada politikoen arabera mugitzen dira. Badakigu Estatu espainiarrak presio izugarriak egiten dituela halakoetan, eta presio horiek egon dira orain ere. Atzoko epaia ahobatezkoa izan zen, baina ANVko zerrenden epaia eman zutenean bi epailek kontrako botoa eman zuten: bat irlandarra zen, eta bestea armeniarra. Hori zerbaitegatik da; beste sentsibilitate bat dagoelako. Epaia espero genuen? Espero zitekeen, bai.

Zein balorazio egiten duzue?

Espero izateak larritasunik ez dio kentzen. Horrek mahaiaren gainean jartzen du errealitate bat: azken urteetan egon diren gertakari politikoekin, batzuek kartola politikoak jarri dituzte, eta badirudi Alderdien Legea ez dagoela indarrean. Esan da legez kanporatzearen zikloa amaitu dela, eta halakoak. Sententzia honek balioko du hori mahai gainean jartzeko. Alderdien Legea hortxe dago, eta mehatxua da, oraindik, gaur egun indarrean dauden alderdi independentistentzat. Eta ez bakarrik Euskal Herrian. Zenbait haitzulo mediatikotatik hitz egiten ari da Kataluniako ERCren edo CUPen kontra, edota Espainiako Estatuan sortzen eta indartzen ari diren talde politiko antikapitalisten kontra.

Legez kanporatzeen aroa ez da amaitu, beraz?

Ez, justu kontrakoa. Damoklesen ezpata dago alderdi independentista eta ezkertiarren kontra. Hori hortxe dago, eta, hemen momentu batean PSOEren edo PPren aldetik aktibatzen bada talde politikoren baten legez kanporatzea, epai hau eskuetan, aurrera joko dute. Hori larria da. Alderdien legea indarrean dagoen bitartean ezin daiteke esan normalizazio politikoa dagoenik. Aukera berdintasunik ez dago politikarako.

Frankismoan legez kanpo utzi zintuzteten, eta orain berriz.

ANV legez kanpo uzten duten hirugarren aldia da, aurrena errepublika garaian izan zen, 1934ko iraultzan parte hartzeagatik, ANVko zenbait batzorde legez kanpo utzi zituzten. Gero Frankismoan, eta orain berriro. Azken finean, herri honen historia da. Esaten dugu 1936tik ez dela urte bakar bat izan euskal preso politikorik gabe, eta, zoritxarrez, esan dezakegu, garai horietatik ez dela hamarkadarik izan ezker abertzaleko erakunderen bat legez kanporatu gabe egon denik.

Epaian akusazio gogorrak egiten zaizkio ANVri: «Espainiako demokraziarentzat arrisku handia» dela, eta «konfrontazio zibila» eragin duela.

Ez dira argudio juridikoak, politikoak dira. Erakunde bat demokraziarentzat arriskutsua dela esatea… ANVk bozetara aurkeztu zenean zerbait egin bazuen, herri askotara normalizazioa ekartzea izan zen. Ezin dugu ahaztu Lizartza eta antzeko herrietan zein ondorio ekarri zituen Alderdien Legeak. Kalte egin zion elkarbizitzari. Bozetan ikusi dugu ezker abertzaleak zein hedapen daukan. Gizartearen oreka kolokan jartzen da, herri askotan aurreneko indar politikoa dena legez kanpo utzita. Elkarbizitzaren kontrako eraso etengabea da. Errazionamenduak Euskal Herriko errealitatetik kanpo daude. Eta, argudioari buelta emanda, esan genezake PP arrisku bat dela Euskal Herriko elkarbizitza sozial eta politikorako, berea inposatzen ari delako, indarrez, gehiengo bati. Argudio horri buelta ematea oso erraza da.

Iturria: BERRIA, 2013ko Urtarrilak 16

Eusko Lurra fundazioa Estrasburgoko Giza Eskubideen Epaitegiak EAE-ANVri buruz emandako epaiaren aurrean.

lurra — Tue, 15 Jan 2013 20:32:55 +0000

Patuaren txantxa gaiztoa dirudi Estarburgoko Epaitegiak EAE-ANVri buruzko epaia frantsesez egin izana.

De Gaulle Euskal Brigada agurtzen, bertan EAE-ANVko Kepa Ordoki komandantea buru zuela.

Argazki historiko honetatik sei hamarkada baino gehiago igaro dira. Bertan Frantziar Errepublikako presidenteak Charles de Gaullek , Gernika batailoiaren aurean, ohorezko doinu militarren artean, zer zin egin zion Kepa Ordoki komandante ekintzale hisitorikoari: “frantziar Errepublikak ez du ahaztuko nazismoaren aurkako borrokan eta “exagonoaren” askatasunaren alde euskalduenk egindakoa. Frantsez mintzatutako hizt hauek “Estatu-arrazoiak” eraman zituen.

Europan non Estatuen aurrean, herritarren eta herrien eskubide sozialak eta politikoak murrizten ari diren, ez gaitu ezustean harrapatu Estraburgotik gaur iritsitako berriak. Izan ere, “Estatuen arrazoia” nagusitzen ari da. Kapitalismo basatiaren interesen alde, joera autoritarioa areagotzen ari da. Zapalkuntza nazionalak eta sozialak salatzeko altxatzen diren pertsonak eta taldeak kriminalizatu nahi dituzte. Beraien begitan, ehunka militanteen odolaz eta hamarkadetako borrokaz irabazitako zilegitasun demokratikoa huskeria da, Estaturik gabeko herri txiki bateko alderdia historiko txikia baita.

Eusko Lurra Fundazioaren konpromisoa tinkoa da. Ezkertiarrak eta abertzalean diren borrokalarien oroimena eta euren erakundeak bermatuko ditugu , eta Euskal Herria independiente eta sozialista izateko borrokan ari diren militanteentzat formakuntza eta ideologizaziorako tresna izango gara.

Epai honek ondare ideologiko hau gordetzeko eta zabaltzeko beharra dagoela baieztatzen digu. Euskal Estatu batek soilik bermatuko du oroimen historikoaren berreskurapena. Egian, Justizian, Erreparazioa eta ez errepikatzeko bermean oinarritzen den Oroimen historikoa. EAE-ANVren kasuan, berriz ere, hauek guztiak urratuak izan dira Frankismoaren ondorengoa den Estatu espainiarrak ilegalizatu baitu, diktadura horrekin haustura demokratikorik ez zen-eta eman.

Euskal Herritarrok independienteak izatean soilik erabaki ahal izango ditugu gure antolaketa, gure historia eta historia horren kontaketa. Bitartean, ofizialki, nazio -zapalkuntza eragiten diguten Estatuen kontaketa baino ez dugu entzungo. Gaur Estrasburgok, Estatu -arrazoiaren” izenean zera erabaki du: Ordokirekin batera argazkian azaltzen diren gudari-ekintzaleak terroristak dira, horra!.

Euskal Herria, 2013ko urtarrilaren 15ean

Antxon Gomezi Info7-n: Estrasburgoko epaiaz eta Eusko Lurraz

lurra — Tue, 15 Jan 2013 12:31:19 +0000

Aritxulegi

“Gaur Info zazpi irratian elkarrizketa Antxon Gomezi, Eusko Lurra Fundazioaren kidea eta EAE-ANVren idazkari nagusia izandakoa. Gai nagusia gaur Estrasburgoko Epaitegiak EAE-ANVren ilegalizazioari buruz aterako duen epaia, baina baita Fundazioaren zenbait kontu ere”